Organisar ils voluntaris – La Quotidiana

Organisar ils voluntaris – La Quotidiana

Il cau dil comite d’organisa­ziun dalla cuorsa d’eveniment a Glion, Gerold Hafner, vul s’en­gaschar per ina uniun da volun­taris per segirar l’existenza e la cuntinuitad da divers events sportivs en Surselva.

Diversas concurrenzas da cuorer en Sur­selva fan pausa ni anflan negina successiun organisatorica per cuntinuar. Tier quels appartegn era la cuorsa d’eveniment a Glion che ha gest terminau sia die­schavla ediziun. A Flem peren­cunter ha ina nova cuorsa da cuo­rer liug l’entschatta zercladur, il Cuors da Flem sin ina distanza da 21,5 kilometers tras igl Uaul da Flem. La gronda sfida dils orga­nisaturs dil Cuors da Flem ei da recrutar avunda gidonters. Sil­meins 50 voluntaris basegna la concurrenza. Meins problems han ils organisaturs da perschua­der curriders da separticipar alla cuorsa che vala per ordvart at­tractiva. Gerold Hafner da sia vart vesa potenzial en Surselva per ina uniun da voluntaris. Ina uniun scaffida per sustener concurren­zas sportivas da tut gener. Pertgei il cau dil comite d’organisaziun dalla cuorsa d’eveniment a Glion ei pertscharts dalla problematica da recaltgar avunda persunal per las concurrenzas sportivas. Per meins problematic valetescha el il fatg d’anflar glieud promta da s’engaschar ein in comite d’orga­nisaziun.

PDF Herunterladen

Add Comment